新買CO2及日本水晶蝦苗

又手痕入左支台灣仔 ISTA 0.8L 直出鋁樽 加 INTENSE 單錶頭連德國電池閥及韓國微調掣，霧化器同計泡器連止流閥都係用 INTENSE 出品的，用佢都係貪樣靚及質量有保證，買左CO2當然係種迷矮啦，之前都種過，不過係DIY CO2，係就係種到，但三兩個星期就要自製都很麻煩，於是到期反缸後再無玩CO2，今次再玩都係朋友開左個草缸用CO2種得幾靚，挑起我條根想玩返，而這套裝備係會放在14吋水晶蝦缸中，因為我決定改變蝦缸用途由淘汰缸變做日本水晶蝦繁殖缸，加上同師兄入左8隻日本「深」系蝦苗，希望到時可以草靚蝦靚然後自家發展落去就正啦。