又到聖誕，又到聖誕，聖誕快樂〜

一年一度聖誕又到了，祝各位師兄聖誕快樂〜

又死蝦

昨日真係傷亡慘重，24吋缸一日內前前後後一共死左六隻成蝦，有一隻藍金，兩雙抱卵紅水晶，三隻紅水晶公，死蝦前兩日一早就見到幾隻蝦殼，之後就發現部份蝦反應慢及身體開始透明，但這幾天就只有補回已曝氣多日的養水，而養水係絕對無問題的，因為同時加進其他缸中都無死蝦及異樣，數據正常到唔正常，開缸四個月，PH 6.6 , GH 6 , KH 2 , TDS 206 , TEMP 24度 , NO3 3至5mg/L , 燈照7小時左右 , 有少量啡藻，之前十一月都試過有幾日連續間中死蝦，現唯有加大供氣，落HAGEN硝化菌,光合硝化菌及底床還原菌睇下情況如何再決定下一步。

消失的光陰

真激氣，更新完個Blog後無啦啦消失晒些圖片，全部變成交叉包，用左幾個鐘頭先放回圖片，希望Blogger唔好再發生＞_＜

睇完又睇不停重複咁睇的blog

由於Yahoo blog 快將要關閉，下圖幾個就係我睇完又睇，不停重複咁睇的blog，當中數個已搬往到新blog及備份了舊有資料，其中andy兄就人間蒸發了，相信佢些資料會從此失傳了，現分享給大家把握最後時間欣賞。

Yahoo blog 快將關閉

過往時常觀看其他師兄所開設的yahoo blog不久之後將會關閉，好多好有用的資料及教學都失傳了，例如andy兄的就係我經常重溫，雖然佢都超耐無更新，不過之前所寫的內容都對各位養蝦人士有非常高的參考價值，希望其他有寫開blog的師兄能夠好好保存現有的資料，以及熱情不要減退，繼續把養水晶蝦的生命一直留存下去〜

輕巧時間啓動電源器

這個時間掣在宜家用八十蚊有找買的，一套兩隻超低用，魚街可能只買到一隻，買佢主要目的係夠輕巧，使用時不會頂住左右其他插掣位置，輕巧方便。

脫離母子關係

出完街回家發現有隻抱卵母蝦連卵帶甲一齊脫左，想信係加左暖管後身體不適所致，看來媽媽都捱不過今晚 ，原本媽媽預產期都係這兩日，現在唯有全力搶救未出世的子代，希望可以順利出世。

德國Tetra 150w 暖管

早兩日氣溫特降，水溫一天內下降左四五度，有兩隻成蝦適應唔到死左，今日才有時間出魚街買返支暖管，有人話24吋缸用100W夠用，又有人話要200W可快些升到理想溫度，我就選擇中間150W，原因好簡單，因為100W如果唔夠力就兩頭唔到岸浪費左支管，而200W升溫升得太快的話就對蝦隻都有不良影響，所以決定買150W就最穩陣啦〜哈哈^_^

九代單傳 虎晶蝦

這隻虎晶蝦齡太約都有一年多，體型大約有2.6〜2.8cm非常大隻，父親係虎紋蝦而母親係紅水晶打出來的，初期都有二三十隻兄弟姊妹的，不過一年多來都未能繁衍下一代，死下死下就只淨低一隻，估計係基因有缺陷導致未能繁殖，所以相信佢會絕後，不過月中發現佢無啦啦抱左卵，真係估佢唔到，父親就只有紅水晶，希望能夠生出一些驚喜及傳宗接代下去，待子代出世後會立即同大家分享^_^

日之丸水晶蝦 母蝦

自14吋缸用作重點繁殖缸後，首次放入比較滿意的三公三母蝦交配，當中公蝦全隊都係白驅，而母蝦就圈丸禁都有，希望出來的子代會有些驚喜，下圖為我比較喜歡的日之丸母蝦^^

小心身體！！

這幾天天氣開始轉涼，仔仔氣管有些毛病，加上早日返左大陸回港後發燒，要入院檢查一下，須要留院一日，現在才接仔仔回家，真係心力交碎，希望仔仔快些好返啦，及各位師兄要注意天氣，小心身體。

白驅水晶蝦 種公

其中一隻在24吋缸中的白驅種公，由細睇住佢大，換一次殻就厚白多一點，不過腳仔就不是太紅，但我都期望所出子代能夠青出於藍。

新買CO2及日本水晶蝦苗

又手痕入左支台灣仔 ISTA 0.8L 直出鋁樽 加 INTENSE 單錶頭連德國電池閥及韓國微調掣，霧化器同計泡器連止流閥都係用 INTENSE 出品的，用佢都係貪樣靚及質量有保證，買左CO2當然係種迷矮啦，之前都種過，不過係DIY CO2，係就係種到，但三兩個星期就要自製都很麻煩，於是到期反缸後再無玩CO2，今次再玩都係朋友開左個草缸用CO2種得幾靚，挑起我條根想玩返，而這套裝備係會放在14吋水晶蝦缸中，因為我決定改變蝦缸用途由淘汰缸變做日本水晶蝦繁殖缸，加上同師兄入左8隻日本「深」系蝦苗，希望到時可以草靚蝦靚然後自家發展落去就正啦。

間中死蝦 T_T

前兩個月開的24吋缸在這幾個星期間中都發現死蝦，有成蝦的、有蝦毛的、有抱卵的、當中還有些酒紅金鋼同藍金鋼，而水質數據又正常，真係死到都有些麻木，但一直都很想找出死亡原因，最近同師兄買開野就順便請教一下，師兄提到水晶蝦如果水質無問題，又不是有外來因素影響，就有機會係水流過強導致蝦隻力盡死亡，有見及此就調細一點濾筒快接流量，經過幾日試驗發覺都有明顯改善，之前蝦隻都不太願意在空地前出現，現在都會出來爬下泥，希望可以停止死蝦就安樂晒〜

再中椒＞_＜

自從早幾日買左第一棵就發覺越睇越靚，所以忍唔到手又買一棵，這棵都係師兄推薦的，不過師兄唔記得個名，我見幾靚同價錢又ok便買左佢返屋企。
另外昨日除左買左支LED燈同辣椒榕外，仲買左好多野，有氣泵、Choice出氣口、PH筆、CO2表頭，全部都係同其他師兄平價收返來的，真係大出血>_<

ADA AQUASKY 361 LED燈 開箱

昨晚得閒上網睇下有無平野買，一係唔睇，一睇就見到一位師兄放ADA 14吋 LED燈(ADA AQUASKY 361)，有盒超新浄，仲要超荀價，正好小弟先頭翻缸時放左支大暴龍PL燈，仲頭痕買咩燈好，當然唔理咁多買左先，取貨後非常滿意，三個字「平。靚。正」

水之天空LED照明系统是為了在小型鱼缸中可以享受水草造景的樂趣而開發的LED照明系统。

為了讓水草生長，在確保充分的光量的同時，還有節约耗電等優點。

並且活用LED的特長的薄型的照明组合，不僅散熱性能極佳，而且優質透明的支架，為您帶来前所未有的開放感。 

水之天空LED燈

主體:
(長280*宽68*高9)mm 

專用支架108-069:
(長360*宽100*高95)mm(36cm缸專用) 

使用於ADA超白玻璃方形魚缸及方形玻璃魚缸中長度為36cm的鱼缸或是此规格的開放式鱼缸。

產品說明

輸入電壓AC100-240V 50/60Hz 

額定瓦数17W ／额定电流0.4A ／

色温度7,000～8,000K ／

LED：1灯0.4W×30灯

中椒毒

昨日手痕痕同網上師兄買左棵辣椒榕試下玩下，雖然不知道真正姓名，不過見佢靚就買左返來，落水後都真係幾鐘意，看來我開始中左「椒」了

新翻兩個14吋缸

早前為了踏入秋季準備爆殖而依依不捨地翻了14吋加14吋並聯缸，但因沒有太多時間，所以只開返一個14吋缸玩極火，做景就用ADA粗幼泥加莫絲同少量水草，不過我超玩野用微量元素把TDS較到去800以上，GH就無度過，不過一定過10度，出來的極火比之前增紅了不少；

而另外一個14吋就清缸只養水，一直無理佢，點知昨日有少少時間又心思思咁手多多再度開返個14吋缸，不過今次不是打橫放係攪攪新意思打直放，前景放熔岩石，後景放泥同沉木，決定把前缸的極火蝦搬遷過來這缸，留空上圖果個缸，打算將來放淘汰水晶蝦，不過兩缸水質又要重新設定一下吧！

台灣 Ellen姐寄來的禮物^^

早前的十四吋並聯缸參加左台灣一個好著名的facebook網站設缸比賽好運地勝出了第一名，獎品係ELLEN姐送出的水晶蝦書籍一本，有玩開水晶蝦的朋友都應該知道她是誰了，月前收到台灣寄來的獎品，ELLEN仲在書上簽上大名（真係開心），最重要係可以在家人面前威下，不用比人成日話「玩咁耐蝦都係得個吉」，各位蝦友加油呀...！

新設24吋ADA水晶缸 之 開缸過程記錄

早一個月第一次新開左個24吋ADA水晶缸，係因為發覺舊的14吋並聯缸蝦B成長生存率低，飼養數量已經超過極限，同時又開始進入秋天爆殖期，所以決定開個大缸玩下，最重要係得到家人的不反對通知書，咁就拿拿臨買料開缸，但由於係第一次玩大缸，所有野都要重新買過，荷包出血程度可謂嚴重，不過最重要開心，間中一次無所謂啦^o^

 

未開封的24吋ADA水晶缸

原裝ADA附件

底材舖滿MA s生物環

所有泥都要用筲箕篩走泥粉

在生物環上舖上ADA粗泥

再舖滿腐植酸原粉

把太古海泥原石打碎

灑上太古海泥粉

後用ADA幼泥覆蓋

放置水草及沉木後放水

大約等一日水清後放硝化菌再打大氣

一個月後放合適水草後景況

水晶蝦 及 虎紋蝦 品種級數圖

在網上見到張圖真係大開眼界，講多無謂睇圖最實際，養蝦必備聖物！